„Ach, wat bin ek freu, Lautabach hät secht, man briuke keine Masken mähr upsetten“ seh Kliene teu mi an´n Tellefon. Ek hal dat nau gornich höat. Obba Kliene es ja jummer vierl flotta wie ek. Es ja auk lange geneuch, dat met de aulen Dinga. Ek weit ja nich wie jiu dat gäht. Ek was et jedenfalls ol lange läd.
Wie dat aule Corona kam un sik olle nich ansticken schulln, hall´n se dor in Berlin ja de Idee met de Masken. Wo schul man denn niu Masken dennekriegen, hät Kliene und ek us froget. Dau hal Kliene ´ne Idee. „Weiße wat, mine Enkelin es vürchtes Joar in Venedig teun Karneval wesen. Dat Lüd hät mi ne ganz feine Masken miebrocht, de nierme ek und di besorge ek auk eine. Äd hät sik nämlich saun poor mäar miebrocht usse Andenken.“
Un denn sind Kliene un ek no Hille föat. Wi wull´n mol saun bitken kieken wat et Neies gift un teuhaupe Kaffedrinken wull´n wi auk. Dor se Kliene: „Lot us güste bi de Kasse haringohn, ek briuke nau´n bitken Geld.“ Wie hät us denn düsse feinen Masken iut Venedig upsettet un sind dor haringohn.
Ji glöbet nich, wat denn kam.
Niu hal Kliene sine Geheimnumma nich bi sik. Un ohne Geheimnumma moket de Automat dat ja nich. „Denn go wi doch an´n Schalta, dor kriege wi auk wat“ hebbe ek secht. Doch wi wi dor nau sau an´n Schalta stön´n, kam de Polizei harin sau wi bi de Krimmis in´n Fernsehen, un heilt us ne Pistole für de Nesen.
„Wat es denn niu laus“, se Kliene. „Wat schal dat. Ek well doch bleus van min Konto fufzig Euro hemm. Es doch min Geld!“
„Nehmen sie erst einmal diese Masken ab“, se de Polizist. „Obba, man schal doch wegen Corona jumma ne Masken dregen. Un iuse Masken sind direkt iut Venedig. Dat es ´n Geschenk van mine Enkelin.“
„Meine lieben Damen“, se denn de Polizei, „solche Masken dürfen sie hier nicht tragen. Die Angestellten in der Bank haben sie für Bankräuber gehalten und den stillen Alarm ausgelöst.“ Kliene und ek Bankräuber, stellt jiu dat mol für. Wer glöft den sau wat. Wi bäden moket doch sau wat nich. Wi obbafallt doch keine Bank.
Inkoft hewwe in Hille an den Doge denn nich mähr. Wi sind gliks wia no Hius föat. Un denn hät Kliene sik an sine Neihmaschinen settet un hät Masken nahet für sik un für mi auk. Dat güng denn auk ne ganze Tiet geut, bet se sik denn in Berlin wir wat annas iutdacht hät. Dor schul man bleus nau FFP2 Masken anteien oder ´ne OP-Maske. OP-Maske – ek briuke doch nich operian. Ek bin doch kein Dokta. Un denn schal man de Masken ja jumma, wenn man se einmol annehadde, wechschmieten. Un wat es denn met de Umwelt? Kliene un ek vastoht de Welt baule nich mähr. Und dat olles für saun lütket Virus, segget se, weil man dat nich seien kann, dat lütke Dingen. Ek hebbe ol dacht, und dat meint Kliene auk, worumme kürnt se dat Virus nich einfach bunt moken, saun bitken raut oder gröin. Denn könne man et seien un sik dorfür in Acht niermen un briuke keine Masken.
Olle Fisematenten hät se in´n Koppe, obba dor es nau keina up kurmen. Obba Masken upsetten, dat schul niu wat bringen.
Gistan hebbe ek van de Gemeinde Noricht krägen, ek schul kurmen wegen min Personalausweis. De wür aflaupen un ek briuke niu ´n neiet Foto. Kann mi mol eina seggen ob dat Foto niu auk met Maske sien mot weil se ja segget, dat dat Virus in´n Herfst wirkumpt und denn gäht dat bestimmt wir laus met de Masken.
Wiesksen in´n Holte Mai 2022
