Freitag, Juni 18, 2021
StartNachrichten up PlattSpionage oder Wat schal dat denn?

Spionage oder Wat schal dat denn?

Wer van jiu het eigenlig in sine Stoben oda saugor in sine Komman saun Dingen, wat olles süht, Billa moket  un de Billa denn wietagift in olle Welt?

Bi jiu nich? Obba dat gift et, dat es ganz sicha! Ek weit dat ganz genau.

Ek seihe ol, ji vastoht mi nich. Dat es obba gornich sau schwoa.

Dormie ji wiertet, wovan ek küa –

Niu mot man wierten, ek was ol ´n poor Johas nich mähr in Hille wesen. Obba irgendwann mot man ja mol saun bitken inne Welt un kieken, wat dor sau laus es. Un denn hebbe ek mi ärs mol no Hille upm Patt moket.

Wat het sik dor doch sau olles vaännat. Man kinnt dat Dorp ja baule nich wia.

Dor konnse ja niu olles köpen, wenne Geld geneuch inne Tasken häs.

Un wie ek dor sau bi de aulen Brennerei was, ji glöbet nich, wat ek dor seien hebbe. Nä, ek meine nich dat Storchennest up den aulen Schosstein. Nä, dat was ja ol jumma sau, dat de Störche auk inne Dörpa keimen un dor boben up de Hüsa ür Nesta beuen. Nä, nä, obba dor an den Neste up den Schosstein in Hille was nau saun Hoken.

Ek hebbe denn auk froget, wat dat denn schul, de Hoken höade dor doch nich hen.

Dau seh  denn saun früme Junge teu mi: „Das ist eine Kamera, die nimmt alles auf was da im Nest passiert und stellt es ins Netz“.

Ek könn ärs nix seggen un hebbe nur den Kop schüttet. Dat et saune Kameras gift und dat man de Billa in Komputas rinmoken kann, un sau olle Welt düsse Billas süht, dat hal ek ol mol höat. Un niu hebbe ek höat, dat gäht auk met düsse lütken, platten Komputas, de man in eine Hand niermen kann und wo man jumma met einen Finger oba dat Dingen wisken döt. Jo, jo, un telefonieren gäht wal auk nau dormie.

Obba dat se niu in Hille bi de Störche int Nest kieket und dat met de Billa in olle Welt  moket, dat gehöat sik doch nich – oda? Und dat in Hille. Bi us inne Gemeinde. Wat het se sik bleus dorbie dacht?

Wenn de Lüe wierten würd, wat in saun Vurgelnest passiat, denn schürt se mol in ürn Goan dorfür sorgen, dat dor Vürgel brüten kürnt.
Dor kürnt de Neidschierigen sik denn auk olles ankieken, obba in de Komputas höat sauwat nich harin. 

Het Vürgel un dormie auk de Störche in Hille denn keine Persönlichkeitsrechte un keine Privatshäre? Kann mi dat mol eina seggen?

Wer dat in Hille met den Hoken moket het, den schulln se man auk mol saun Hoken int Hius stelln …! Na, ji wiertet ol, wat ek meine …

Wiesken in´n Holte, 19.04.2021; Beitragsbild: Nestkamera, Rainer Eschedor

Most Popular

Recent Comments